Mbledhja e Kryesisë së Kuvendit ka dështuar pas bojkotimit të saj nga LDK dhe VV. Madje opozita është e gatshme që qysh nesër ta dorëzoj mocionin për rrëzimin e Qeverisë.
Shefi i Grupit Parlamentar i LDK-së, Avdullah Hoti tha se nuk mund të ftohet seanca me koalicion të pakicës.
“Nuk mund të ftohen seancat e Kuvendit ndërkohë që të gjitha pikat nga shtatori i vitit të kaluar janë në një seancë maratonike. Nuk ka kuptim që të thirren seanca të tilla. Ne shprehim qëndrimin që jemi të gatshëm të ulemi për ta si të nxjerrim vendin nga kjo krizë. Dhe ajo është që të ulemi dhe të caktojmë datën e zgjedhjeve”, tha Hoti.
Ndërsa deputetja e VV-së, Albulena Haxhiu tha se opozita e lëshoi mbledhjen e kryesisë së Kuvendit për shkak të arrogancave të përfaqësuesit të pakicës ose PAN.
“Zgjidhja e vetme janë zgjedhjet. Opozita nuk pranon që të vazhdojë kinse nuk ka ndodhur asgjë edhe për kundër skandaleve edhe përkundër vendimeve politike. Qysh nesër të dorëzohet mocioni për rrëzimin e qeverisë pavarësisht a i kemi 61 nënshkrime apo jo. Zgjedhjet janë e vetmja mundësi për të dalë nga kriza”, tha Haxhiu.
Shqipe Pantina nga PSD ka thënë se ka thënë se do t’i kenë 12 vota të PSD-së kurdo që dorëzohet mocioni.
“PSD Ka dorëzuar mocionin për rrëzimin e Qeverisë, por ne mendojmë se derisa t’i sigurojmë të gjitha vota për rrëzimin e Qeverisë, ta mbikëqyrim Qeverinë”, ka thënë Pantina. /Telegrafi/
