Ministria e Bujqësisë, Pylltarisë dhe Zhvillimit Rural, ka hapur periudhën për aplikim për disa nga masat mbështetëse për këtë vit, përmes granteve investive për fermerët në gjithë territorin e Kosovës.
Sipas njoftimit, buxheti për këto masa për zhvillim rural, këtë vit arrin në 20 mijë e 500 euro.
“Thirrjet për aplikim janë hapur për masën 101, përmes së cilës përkrahen investimet në asetet fizike në ekonomitë bujqësore. Për masën 103 përmes së cilës përkrahen investimet në asetet fizike në përpunimin dhe tregtimin e prodhimeve bujqësore. Për masën 302 përmes së cilës përkrahen investimet në diversifikimin e fermave dhe zhvillimin e bizneseve, për masën e ujitjes së tokave bujqësore. Për masën 303, përmes së cilës përkrahen investimet në përgatitjen dhe zbatimin e strategjive të zhvillimit lokal –Qasja Leader – Për grupet lokale të veprimit të përzgjedhura.”, thuhet në njoftim.
Kjo ministri ka bërë të ditur se aplikimi është hapur sot më 22 maj dhe do të zgjasë deri më 1 korrik të këtij viti.
Gjatë kësaj periudhe për aplikim, fermerët dhe agrobizneset mund të aplikojnë për të përfituar në kuadër të masave të paralajmëruara më lartë dhe duke u bazuar në dokumentacionin, procedurat dhe kriteret e parapara me program, e të cilat janë publike në faqen e ministrisë dhe Agjencisë për Zhvillimin e Bujqësisë (AZHB).
“Për të gjitha procedurat e aplikimit dhe dokumentacionin e nevojshëm, fermerët dhe agrobizneset do të mund t’i gjejnë informacionet në uebfaqen e Agjencisë për Zhvillimin e Bujqësisë, www.azhb-ks.net dhe në uebfaqen e Ministrisë së Bujqësisë Pylltarisë dhe Zhvillimit Rural www.mbpzhr-ks.net. Po ashtu, ata mund të informohen edhe në Zyrat Rajonale të AZHB-së.”, është thënë më tutje./Kallxo.com
