Trajneri i xhudos Driton Kuka, ka njoftuar se i është bashkuar Aleancës për Ardhmërinë e Kosovës.
Kuka në Facebook ka shkruar se përveç kontributit sport, sipas tij do ta jep edhe në politikë.
“Parimet e mia në punë drejt sukseseve ishin dhe janë qëndrueshmëria dhe respektimi fjalës së dhanë! Virtyte këto të Kryeministrit në detyrë z. Ramush Haradinaj! Këto parime ishin vendimtare që t’i bashkohem që kontributin tim në sport por jo vetëm tash e tutje ta jap edhe përmes Aleancës për Ardhmërinë e Kosovës! Ka shumë gjëra në Kosovën tonë që duhet shtyrë përpara sidomos në sport e rini që kemi! Kam miq në çdo parti politike dhe parimi im është bashkëpunimi për të mirë të vendit! Kosova mbi të gjitha…”, ka shkruar Kuka.
Lajmin e ka konfirmuar edhe ish-kryeministri Haradinaj, duke thënë se është i lumtur që edhe një anëtar i familjes së respektuar atdhetare Kuka, po e vazhdon traditën me Aleancën.
“Sot jam jashtëzakonisht i nderuar me vendimin e Driton Kukës, një ndër heronjtë e sportit tonë, trajneri i suksesshëm dhe meritor që Kosova ka fituar qindra medalje të arta në xhudo, që t’i bashkohet familjes së madhe të Aleancës. I pakompremetuar në asnjë aspekt, ai pos që ngriti yjet e përmasave globale dhe arriti t’i sjellë Kosovës Medaljen e Artë Olimpike, është i biri i Ali Kukës, kryetarit të parë të nëndegës së AAK-së në Pejë “2 Korriku”. I lumtur që edhe një anëtar i familjes së respektuar atdhetare Kuka, po e vazhdon traditën me Aleancën. Na priftë e mbara!”, ka shkruar Haradinaj në Facebook.
Ndryshe, Kuka njihet si trajneri më i suksesshëm i xhudos në Kosovë, tek sa sportistët e tij si Majlinda Kelmendi, Akil Gjakova dhe Nora Gjakova kanë fituar medalje të ndryshme. /Telegrafi/
