“Nuk mendoj se serbët do të na japin ndonjë gjë. Shpresoj që të mos ketë një tjetër luftë, por ne do të luftojmë sërish nëse është e nevojshme. Kemi punë të papërfunduara”, deklaroi Berat Dana i cili po qëndronte së bashku me një grup të ish-bashkëluftëtarëve kur u intervistuan nga “The Indipendent”.
Ky medium britanik ka shkruar për masakrat që ndodhën në Gjakovë para 20 vitesh, dhe citon Danën të cilit i janë vrarë 13 anëtarë të familjes së tij ndërsa ai po luftonte në radhët e UÇK-së.
Gazeta përshkruan se si janë vrarë e torturuar njerëz dhe shumë objekte historike janë shkatërruar. Dana kishte arritur të gjente dy policë të cilët ishin të përfshirë në masakrën e 10 majit 1999, ku mbetën të vrarë anëtarët e familjes së tij.
“Gjeta emrat e dy policëve të cilët ishin të përfshirë në arrestime dhe i kontaktova pas luftës. Dëshiroja të zbuloja se çfarë ndodhi me të zhdukurit. Gjurmova një në Mal të Zi, por më thanë se ishte i sëmurë. Pra, kemi të gjitha këto vrasje dhe nuk është e lehtë të falësh”, tha ai.
Shkëndije Hoda është pjesë e një grupi që po grumbullon dëshmi për të gjitha ato çfarë ngjanë në Gjakovë, duke i dorëzuar Prokurorisë dhe duke u kujdesur që të mos i mbulojë pluhuri i harresës.
Vëllai i Shkëndijës, Hekurani, i cili edhe ai ka qenë pjesë e Ushtrisë Çlirimtare të Kosovës ka rrëfyer se pa ndihmën e NATO-së, SHBA-së dhe Britanisë së Madhe, nuk do të ishte i mundur çlirimi i Kosovës. /kp/Telegrafi/
